La storie dal Friûl e je stade segnade di un moviment fuart di resistence autonomistiche che in concret al voleve dî difese da l’identitât lenghistiche-culturâl dal popul furlan, ma ancje rivendicazion dal so dirit al autoguvier. Ise une pagjine che zaromai e parten al passât o podie sei proietade e tornade a vivi ancje intune declinazion tal avignî? Al è di chest che si fevelarà tal prossim apuntament di In File.
A stiçâ chest interessant dibatit, che al sarà presentât e coordenât di Andree Valciç, diretôr da la Patrie dal Friûl, a son stâts invidâts William Cisilino, studiôs da lis Minorancis europeis; Gianfranco Ellero, poliedric studiôs da la culture e dal autonomisin furlan; Omar Monestier, diretôr dal Messaggero Veneto.
Chest confront di ideis al è fat pal aniversari dai cincuante agns dal Statût di Autonomie da la Regjon FVG. Pal Friûl a son cuestons cruciâls ch’a son restadis cence soluzion, e al è impuartant capî parcè ch’a son sfantadis lis condizions di une cussiente fuarte di identitât, cu la conseguent assence di un grant moviment autonomist. Cjapant idee dal libri “Sorestants e sotans: interviste sul Friûl” scrit a cuatri mans di Cisilino cun Gianfranco D’Aronco, un dai personagjos plui significatîfs e resistents dal autonomisin furlan, impegnât bielzà dal 1947 cul Moviment Popolâr Furlan, la serade e proferirà l’ocasion par tornâ disore da lis tapis plui rilevantis di cheste storie impuartant, tacant da la fin dal Votcent par rivâ ai nestris dîs e ai pronostics pal avignî.
La jentrade e je vierte pai socis. La tessare di soci pal 2013 e je di 20 euros e si po notâsi cuant che si jentre.
