Martars ai 3 di Avrîl, aes 16.30, li de Biblioteche Comunâl di Cjamin dal Tiliment, si podarà assisti ae presentazion dal libri par fruts, dut scrit par furlan, Lis storiis di Inge e Bach, di Luca De Clara. La iniziative, promovude e volude de Aministrazion Comunâl di Cjamin dal Tiliment, dentri dai locâi de sô biblioteche, e nas de volontât di memoreâ e ricuardâ la Fieste de Patrie dal Friûl (ai 3 di Avrîl dal 1077 – ai 3 di Avrîl dal 2012), tant che event di mantignî te memorie coletive, e al timp stes, par chel che al è pussibil, e vûl jessi un stimul pes gjenerazions gnovis a doprâ la marilenghe, tant che veicul di comunicazion no dome dentri des parêts di cjase, ma in ogni moment de cuotidianitât.
Il test Lis storiis di Inge e Bach, burît fûr di Kappa Vu edizions e insiorât des imagjinis di Francesca Gregoricchio, al met dongje lis aventuris di doi orsuts ninins che, compagn a ducj i nestris fruts, a son curiôs di cognossi e di discuvierzi dut ce che al è ator di lôr. L’ors Amleto, la copasse Linore, i doi sghirats, il cierf e tancj altris animâi a acompagnaran Inge e Bach, di mês in mês, ae scuvierte dai boscs di Tarvis, fin cuant che al rivarà l’Unvier, e a laran in letarc. Ae presentazion dal libri al sarà presint l’autôr Luca De Clara che al leiarà lis storiis a chei che a saran culì e po dopo ducj insieme, gjenitôrs e fruts, o piturarìn i personaçs di chestis bielis aventuris.
La jentrade e je libare.
