Une flabe di lei, di cjalâ e di mangjâ! Cun cheste definizion l’Editôr Sinnos al descrîf in maniere perfete la piçule, ma impuartante publicazion che îr e je stade presentade tal teatri comunâl di Cividât.
La idee di un libri su la gubane e je nassude intun incuintri jenfri la scritore Chiara Carminati, la ilustradore Pia Valentinis e i fruts des Scuelis de Infanzie di Cividât dentri tes iniziativis dal progjet Nassûts par Lei organizadis de Biblioteche civiche. In chel incuintri la Carminati e à contât, improvisant, la storie de nassite de gubane, compagnade dai dissens de Valentinis. Fruts e insegnants indi son restâts cussì tant inmagâts di domandâ plui voltis di podê vê in prestit il libri di dulà che e jere stade tirade fûr la storie.
De idee si è rivâts ae publicazion graciis al jutori economic fondamentâl de Agjenzie Regjonâl pe Lenghe Furlane, dal Comun e de Bancje di Cividât; cumò, finalmentri, il libri al esist si intitule Il Diaul e la Gubane (si pues comprâ in dutis lis librariis, Editore Sinnos).
Devant di cuasi tresinte fruts des scuelis primariis di Cividât e dai comuns dongje, la scritore Carminati e à let il test e cjapât dentri i fruts biel che la ilustradore Pia Valentinis è à creât in direte suntun schermi grant, lis ilustrazions. Une vore emozionantis, cun di plui, Tiziana Perini e Anna Bernich che a àn recitât la storie par furlan e par sloven.
L’assessôr comunâl Mario Strazzolini al à fat i onôrs di cjase e al à ricuardât l’iter dal progjet spiegant ai fruts che “la gubane di cualchi an in ca si confronte cui dolçs internazionâi, tant che la la Sacher, rivant a vê simpri ricognossiments impuartants. La gubane di Cividât, cun di plui, e à ancje il record mondiâl di Gubane plui grande dal mont”.
Marco Stolfo al è intervignût puartant i salûts dal president de ARLeF, Lorenzo Fabbro, e si è indreçât a ducj i presints disint che “lis lenghis a son un valôr, un dirit e une risorse par ducj. Lei, viodi e scoltâ une storie in trê lenghis e je une esperience plasevule e educative. La diversitât linguistiche e je une carateristiche uniche dal nestri teritori e e merete atenzion e valorizazion ancje pes gjenerazions che a vignaran”.
A ducj i fruts presints e aes lôr insegnants, ae fin de presentazion, il Comun di Cividât, par mieç de biblioteche, ur à regalât une copie dal libri e une gubanute. “Un ringraciament dovût – al à sierât Strazzolini – aes aziendis che a àn regalât lis gubanis e che a àn contribuît a fâ deventâ speciâl cheste iniziative: Cattarossi, Cedermas, Dall’Ava, Del Fabbro, Del Foro, Dorbolò, Giuditta Teresa, La Ducale, La Gubana della Nonna, Vogrig”.
